Ubwandu bushya bwa Covid-19 ni yo ntandaro yisubikwa ry’ ibikorwa byari gufungurwa .Dr Ngamije Daniel

Yanditswe na Editor

Mu itangazo ryo ku wa 31 Gicurasi 2020 ,Guverinoma y’u Rwanda yatangaje ko nyuma y’isesengura ryakozwe hagamijwe gukomeza kurinda ikwirakwira ry’icyorezo cya COVID19 giterwa na Coronavirus, ingendo zihuza Intara n’Umujyi wa Kigali ndetse na moto zitwara abagenzi bikibujijwe.

Ni mu gihe byari biteganyijwe ko kuri uyu wa 1 Kamena 2020, ingendo zihuza Intara n’Umujyi wa Kigali zisubukurwa ndetse na moto zitwara abagenzi zigasubira mu mirimo yazo hubahirizwa amabwiriza.

Itangazo ryo mu biro bya Minisitiri w’Intebe ryo kuri iki Cyumweru tariki 31 Gicurasi2020, rivuga ko ingendo zikibujijwe.

Rikomeza rigira riti “Nyuma y’isesengura, ingendo hagati y’intara zitandukanye, hagati y’intara n’Umujyi wa Kigali hamwe na moto zitwara abagenzi biracyabujijwe mu rwego rwo kurengera ubuzima bw’abaturage.”

Dr Ngamije asaba abanyarwanda gukomeza gukumira Covid-19

Minisitiri w’ ubuzima Dr Ngamije Daniel asobanura impamvu yo gusubika ingendo zambukiranya intara ndetse n’ umujyi wa Kigali ndetse no gutwara abagenzi kuri moto, yavuze ko impamvu hafashwe icyemezo cyo kudasububukura ingendo z’abamotari n’izihuza Intara n’Umujyi wa Kigali, byatewe no kuba hari ubwandu bushya bwagaragaye mu Karere ka Rusizi, aho hagaragaye abantu 5 bamaze kwandura Covid_19.

Iri tangazo rikomeza rivuga kandi ko “Ingamba nshya zo kurwanya Covid-19 zizatangazwa n’Inama y’Abaminisitiri yo ku wa 2 Kamena 2020.”

 3,247 total views,  2 views today