Sunday, April 28, 2024
Latest:
Ubukungu 

COVID-19: Abanyamuryango ba Sacco bishimiye ikemezo Banki nkuru y’igihugu yafashe

Rwandayacu02

 

Yanditswe na Chief Editor

Nyuma y’aho Banki Nkuru y’u Rwanda, (BNR), yakuyeho amabwiriza yari yashyizeho ku wa 24 Werurwe 2020 , agena amafaranga ntarengwa amakoperative yo kubitsa no kugurizanya (SACCOs) yemerewe kubikuriza abanyamuryango bayo, mu gihe hatangizwaga Gahunda ya Guma  mu rugo hirindwa ko  Covid-19, ikomeza gukwira  mu baturage,iki kemezo kikaba cyashimishije abakozi ba za Sacco ndetse n’abanyamuryango bazo.

 

Bimwe mu byemezo Banki nkuru y’igihugu yari yafashe harimo ko  nta SACCO yemerewe kurenza amafaranga ibihumbi 150, abikuzwa n’umunyamuryango umwe , mu cyumweru, aho umucuruzi w’ibiribwa yagombaga kubikuza nibura amafaranga atarenga ibihumbi Magana atanu, buri munyamuryango w’itsinda rikorana na Sacco, yagombaga kubikuza ibihumbi mirongo itanu mu cyumweru.

Nyuma y’uko inama y’abaminisitiri yateranye kuwa 30 Mata2020 yemereye bimwe mu bikorwa gukomeza, BNR yakuyeho ayo mabwiriza, nk’uko itangazo ryashyizweho umukono na Guverineri wa Banki Nkuru y’u Rwanda, John Rwangombwa.

Iri tangazo riragira riti:  “Ibipimo ntarengwa byihariye byo kubikuza byari byashyizweho n’itangazo ryo kuwa 24 Werurwe 2020 bikuweho kugira ngo abanyamuryango b’ayo makoperative babashe gukora imirimo yabo nta nzitizi,za  SACCO zikaba zisabwa gukomeza gukurikiza amategeko n’amabwiriza asanzwe agenga urwego rw’imari iciriritse.”

Sacco ya Rugera ni imwe muzishimiye ko Banki nkuru y’igihugu yahinduye ibyemezo byo kubikuza amafaranga umunyamuryango ashaka(foto Ngaboyabahizi Protais).

Bamwe  mu banyamuryango ba Sacco Rugera Mukeshimana Venerand, wo  mu kagari ka Nyarutembe, umurenge wa Rugera, avuga ko bishimiye iki gikorwa.

Yagize ati: “ Iki gikorwa ni ingirakamaro kuba Banki nkuru y’igihugu yahaye uburenganzira za Sacco, bwo kuba noneho umunyamuryango yakura kuri konti ye amafaranga umva ashaka, kuko nakuragayo agera ku 150000 yenda nshaka kugura ikirenze, bigasaba ko negera mugenzi wanjye akampa ideni nkazayamwishyura mu kindi cyumweru, ibi rero ni bimwe mu bituma turakomeza kwiteza imbere, ikindi turakomeza twirinde Covid-19, twirinda nanone gukomeza guhererekanya amafaranga mu ntoki, ahubwo turabinyuza mu buryo bw’ikoranabuhanga”.

Munyentwari Pierre Celestin, ni  Umucungamutungo wa Sacco Rugera yo mu karere ka Nyabihu, nawe avuga ko ikemezo Banki nkuru y’igihu yafashe ari ingirakamaro.

Yagize ati: “Iki ni iigikorwa cy’ingirakamaro, kuko itangazo risohoka ryavuga ukuri, ariko ku muturage ho wasangaga hari amakimbirane hagati ya Sacco n’umunyamuryango wayo cyane ko yazaga akakwereka umushinga ariko ugasanga nta kundi wabigenza kubera ko nta mafaranga arenze umubare Banki nkuru y’igihugu, ikindi ni uko muri iyi minsi ntabwo bari kuza kwizigamira ahubwo bo barabikuza gusa, ibi nkaba nsanga nibikomeza gutyo bakajya babikuza batabitsa cyaba ari ikibazo”.

Uyu Mucungamutungo akomeza asaba abanyamuryango, ni uko bajya baza kubikuza bayajyana mu bushabitsi (Business), ikindi bagakomeza no kwizigamira, ubu Sacco ya Rugera  ifite abanyamuryango 5335.

 

 2,681 total views,  2 views today

You May Also Like

Iburengerazuba: Minisitiri Shyaka ashishikariza abashoramari kubyaza umusaruro ibyiza nyaburanga bigaragara muri Nyamasheke

Rwandayacu02

Rusizi:Kutagira ibiciro bihamye bituma aborozi bajyana amata muri Kongo –Kinshasa

Rwandayacu02

Icyuho mu iterambere abaturarwanda kizagaragazwa n’ibarura rusange rya 5 Yanditswe na Ngaboyabahizi Protais Mu gihe umwaka utaha wa 2022 mu Rwanda hateganyijwe ibarura rusange ry’abaturage, impuguke mu bukungu zavuze ko iri barura rizagaragza ahakiri icyuho mu guteza imbere abaturage, bityo zigaragaza n’ingamba zafatwa mugihe byagaragara ko abanyarwanda biyongera ku muvuduko udasanzwe. Ubusanzwe ikigereranyo cy’Ikigo gishinzwe Ibarurishamibare kigaragaza ko kugeza ubu abanyarwanda bagera kuri miliyoni 13. Ariko muri Kanama umwaka utaha wa 2022 u Rwanda ruzakora ibarura rusange ry’abaturage, kugira ngo rumenye neza umubare nyawo w’abaturage barwo, hagamijwe kugena ibigomba kubakorerwa byatuma batera imbere mu bukungu no mu mibereho yabo ya buri munsi. Bamwe mu baturage basanga ibarura rusange rifite akamaro ndetse bakagaragaza ingamba zikwiye gufatwa mu maguru mashya, mu gihe byagaraga ko ko abanyarwanda biyongera ku muvuduko uri hejuru. Umwe ati “ Abaturage benshi ntabwo babura kuba ikibazo, kuko iyo babaye benshi ntacyo gukora, batuma igihugu kidindira.” Undi ati “ Numva buri munyarwanda yakabyaye abana batatu, azashobora kurera, kuko n’akazi kabuze.” Undi muturage yagize ati “ Leta yadushakira imirimo kandi ikoroshyamo ukuntu, buri wese agakora kumafaranga.” Ibarura rusange riheruka muri Kanama 2012 rigaragaza ko u Rwanda rwari rutuwe n’abaturage 10, 537,222 abantu biyongereyeho 2, 6% ugereranyije no mu 2002 aho abatuye u Rwanda bari 8,128,553. Abasesengura imy’ubukungu basanga mu myaka 10 ishize hakozwe ibarura rusange, hari byinshi byakozwe mu guteza imbera abaturage, ariko ko irizaba umwaka utaha rizagaragaza aho igihugu gikwiriye gushyira imbaraga, mu guteza imbere abaturage. Habyarimana Straton impuguke mu bukungu arabisobanura. Ati “Bifasha igihugu kumenya ngo ahantu hatashyizwe ingufu ni hehe? Noneho dushaka kunoza? Hari igihe ubasha kumenya uti abantu bize ni aba naba, abantu babasha kugera ku bigo by’imari ni aba, ababasha kugera kuri interineti ni aba. Ibyo byose bituma umenya uti nubwo nkora ibintu byiza, hashobora kuba hari ahantu nateshutswe mfite intege nke, bityo ukabafasha kubikosora hakiri kare iyo ni indi impamvu ya kabiri ibarura rifasha mubukungu bw’igihugu.” Habyarimana yakomeje agira ati “Kuba tubizi ko umubare w’abaturage wiyongera ni byiza harimo amahirwe, ariko hari ibintu tugomba kwitondera. Icya mbere kugira ngo kuzamuka kw’abaturage benshi amahirwe ni uko abo baturage tubabyaza umusaruro. Iyo rero ufite abantu bangana na 16% badafite akazi, ayo ni amaboko atabyazwa umusaruro.” Ikigo cy’Igihugu cy’Ibarurishamira giherutse kujya inama ko inzego bireba zikwiye gufata ingamba, kugira ngo ubwiyongere bw’abaturage bube amahirwe ku gihugu. “Urebye mu myaka 30 tuzaba turi byibura miliyoni 22. Umuntu ashobora kuvuga ati ibyo biteye ikibazo! Bishobora kuba ari ikibazo ariko byaba n’amahirwe, ndetekereza ko uwo mubare abantu bakwiye kuwubyaza umusaruro”. Ivan Murenzi ni umuyobozi wungiriye w’ikigo cy’ibarushimamibare Iki kigo kandi kivuga ko ibarura rusange ritaganyijwe umwaka utaha, rizagaragaza ifoto y’imibereho y’abanyarwanda muri iki gihe nk’uko Venant Habarugira ushinzwe amabarura mu kigo cy’Igihugu cy’Ibarurashimibare. Ati “Tubaza ibintu byinshi abaturarwanda bose kugira ngo tumenya kwa kuntu babayeho, wa mubare ni bangahe kuva ku rwego rw’igihugu, kugera ku rwego rw’Akagari n’umudugudu. Ibarura ryonyine niryo ritanga imibare y’abaturage kugera ku rwego rwo hasi rushoboka. Ubwo rero ibiva mu ibarura ni byinshi cyane, kuko niryo ritwereka ishusho rusange y’uburyo abaturage bahagze mu gihugu.” Ni ku nshuro ya Gatanu u Rwanda rugiye gukora Ibarura Rusange ry’Abaturage risanzwe rikorwa buri myaka 10, uyu ni umwe mu mishinga y’ibanze Igihugu gishingiraho kugira ngo kigene ibigomba gukorerwa abaturage.

Rwandayacu02