Rwanda: Amashuri yo muri Nigeria yaje kwigira kuri Wisdom School Rwanda

Abahagarariye amashuri yigenga yo muri Nigeria bageze muri Wisdom School Rwanda mu Karere ka Musanze, bashaka kwigira ku buryo iri shuri ryubatse uburezi bushingiye ku ireme, indangagaciro n’umuco, ndetse n’uburyo ritegura abanyeshuri gukomeza amasomo ya kaminuza mu Rwanda no mu mahanga.

Uru ruzinduko rwabaye ku wa Gatanu, tariki ya 14 Kanama 2026, rwabaye igice cy’urugendo rw’iminsi itandatu uru tsinda rw’abayobozi b’amashuri rwo muri Nigeria rwakoreye mu Rwanda, mu rwego rwo kureba ibyo urwego rw’uburezi rw’u Rwanda rumaze kugeraho no gushaka amasomo rwakwifashisha mu guteza imbere amashuri yigenga yo muri Nigeria.

Intumwa zo muri Nigeria zasobanuriwe imikorere ya Wisdom School Rwanda na Nduwayesu Elie Umuyobozi wayo

Abashyitsi bagera kuri 35, barimo ba nyir’amashuri n’abandi bayobozi b’amashuri yigenga, basuye Wisdom School, bareba ibikorwa by’ishuri, uburyo abanyeshuri bigishwa n’imyitwarire yaryo mu gutegura umwana ushobora gukomeza amasomo no guhangana ku rwego mpuzamahanga.

Icyatumye Wisdom School iba ahantu h’ingenzi muri uru ruzinduko ni uburyo iri shuri ryagerageje guhuza uburezi bufite ireme, indangagaciro nyarwanda n’amahirwe mpuzamahanga ku banyeshuri baryo.

Dr. Harrison Okeke, Umujyanama Mukuru w’ishyirahamwe OPSAN rihuriyemo amashuri yigenga muri Nigeria, wari uhagarariye iri tsinda, yavuze ko batari baje kureba inyubako z’ishuri gusa, ahubwo bashakaga kumenya igitekerezo n’imikorere biri inyuma y’ibikorwa bagejejweho.

Yagize ati: “Turi mu Rwanda mu ruzinduko rw’iminsi itandatu rugamije kongera ubushobozi bw’abayobozi b’amashuri. Turimo kwiga imikorere y’amashuri yo mu Rwanda no kureba ibyo twakwifashisha mu guhindura no guteza imbere gahunda y’uburezi dufite, cyane cyane mu mashuri yigenga.”

Dr. Harrison Okeke, Umujyanama Mukuru w’ishyirahamwe OPSAN rihuriyemo amashuri yigenga muri Nigeria

Mu byo abashyitsi bo muri Nigeria bagarutseho nyuma yo gusura Wisdom School, harimo uburyo iri shuri rishyira indangagaciro n’umuco mu burezi.

Dr. Okeke yavuze ko ibyo babonye byatumye basobanukirwa ko uburezi bwiza budashingira ku nyubako n’ibikoresho gusa, ahubwo ko n’indangagaciro z’umunyeshuri ari ingenzi mu kumutegurira ubuzima bwo hanze y’ishuri.

Yagize ati: “Icyo tujyanye iwacu ni agaciro n’akamaro ko gushyira imbere indangagaciro n’umuco. Ibyo ni byo shingiro ry’ibikorwa by’iri shuri. Ntabwo ari inyubako gusa twaje kureba, ahubwo gahunda y’indangagaciro ni yo yatangaje benshi muri twe.”

Ni igitekerezo cyahuriranye n’intego Wisdom School ivuga ko imaze igihe ishyize imbere: gutanga ubumenyi bujyana n’igihe, ariko umunyeshuri akagira n’indangagaciro zimufasha kuba umunyarwanda wubaha umuco we kandi ushobora gukorera no kwiga ahantu hatandukanye ku Isi.

Abo muri Nigeria  banejwejwe n’ibyo basanze kuri Wisdom School Rwanda, nk’uko Nduwayesu yabibasobanuriye

Umuyobozi wa Wisdom School Rwanda, Nduwayesu Elie, akaba na Visi Perezida wa Rwanda United Private Schools Association (RUPSA), yavuze ko kuba iri tsinda ryarahisemo gusura Wisdom School byaturutse ku mishinga iri gushyirwa mu bikorwa n’iri shuri mu rwego rwo guteza imbere ireme ry’uburezi no gutegura abanyeshuri gukomeza amasomo ya kaminuza.

Yagize ati: “Aba bantu bo muri Nigeria ni abahagarariye amashuri yigenga. Basabye amashuri yigenga yo mu Rwanda yibumbiye muri RUPSA, nkaba ndi Visi Perezida wayo, ko baza gusura Wisdom bitewe n’imishinga dufite dushobora gukorana, ndetse baje no kutwigiraho ibyo dukora.”

Nduwayesu avuga ko mu byo abashyitsi baganiriyeho harimo ubufatanye bushobora guhuza amashuri yigenga yo mu Rwanda n’ayo muri Nigeria, by’umwihariko mu bijyanye no guhererekanya ubumenyi, abanyeshuri n’amahirwe yo gukomeza amashuri mu mahanga.

Ati: “Biyemeje kuba basinyana amasezerano ajyanye cyane cyane no gutegura abanyeshuri kujya muri za kaminuza zo mu bihugu byo ku yindi migabane dufitanye amasezerano, haba muri Amerika, Philippines, Canada, u Bushinwa, u Buhinde n’ahandi.”

Muri gahunda Nduwayesu yagaragaje nk’iziri gufasha Wisdom School gutegura abanyeshuri ku rwego mpuzamahanga harimo Pathways, igamije korohereza umunyeshuri gukomeza amasomo ya kaminuza mu mahanga.

Muri iyi gahunda, abanyeshuri barangije umwaka wa gatandatu w’amashuri yisumbuye bashobora gutangira amasomo ya kaminuza mu Rwanda, bakazakomereza mu mahanga mu mwaka wa nyuma w’amasomo, bitewe na gahunda n’amasezerano ahari hagati y’amashuri.

Nduwayesu ati: “Kugeza ubu nka Wisdom School dufite imishinga myinshi yo kuzamura ireme ry’uburezi duha abana bacu no kubategura uko bazajya muri za kaminuza, mu byitwa Pathways. Ku banyeshuri barangije umwaka wa gatandatu w’amashuri yisumbuye, bashobora kwiga muri kaminuza yo hanze imyaka ibiri ya mbere bakayiga mu Rwanda, umwaka wa nyuma bakajya kuwurangiriza muri iyo kaminuza yo hanze.”

Iyi gahunda ishyira Wisdom School mu murongo w’amashuri atangira gutegurira umwana amahirwe yo gukomeza amasomo hanze mbere y’uko arangiza amashuri yisumbuye.

Ku ruhande rwa Wisdom School, uru ruzinduko rufatwa nk’ikimenyetso cy’uko ibikorwa by’iri shuri bishobora kuba bimaze kugira umwanya mu biganiro by’uburezi birenga imbibi z’u Rwanda.

Nduwayesu avuga ko kuba abahagarariye amashuri yo muri Nigeria barahisemo kugera kuri Wisdom School bifite icyo bisobanuye ku bikorwa by’iri shuri.

Yagize ati: “Kuba baduhisemo bivuze ko Wisdom School hari ibyo dukora bishimwa n’Abanyarwanda ndetse n’abanyamahanga, kandi batubwiye ko hari byinshi batwigiyeho.”

Yavuze ko ubufatanye hagati ya RUPSA n’amashuri yo muri Nigeria bushobora no gutuma abanyeshuri bo mu bihugu byombi babona uburyo bwo gusangira ubumenyi no kumenyana, ndetse bamwe bakagira amahirwe yo kwiga mu kindi gihugu.

Yagize ati: “Ibi bishobora gutuma Wisdom School igera ku ntego zayo za Pathways binyuze mu buryo bwo guhererekanya abanyeshuri, haba abava muri Nigeria baza mu Rwanda, ndetse n’abava mu Rwanda bajya ahandi. Wisdom School ikaba umuyoboro wo kubafasha kugera kuri ayo mahirwe.”

Ubuyobozi bwa Wisdom School buvuga ko ubwo bufatanye butareba ishuri rimwe gusa, ahubwo bushobora kugira uruhare mu gukomeza imikoranire y’amashuri yigenga yo mu bihugu bya Afurika.

Nduwayesu ati: “Ibi biba ipfundo ryiza rishimangira ko Afurika ari imwe kandi ko dukwiye guharanira kuyiteza imbere mu mbaraga zimwe.”

Dr. Harrison Okeke yavuze ko nyuma yo gusura Wisdom School, iri tsinda ryari rifite izindi gahunda zirimo guhura n’abayobozi batandukanye no gukomeza kwiga ku mikorere y’urwego rw’uburezi mu Rwanda.

Uruzinduko rwabo rwari ruteganyijwe gusozwa ku Cyumweru, tariki ya 16 Kanama 2026, nyuma yo gusura ibice bitandukanye by’u Rwanda mu rwego rwo kurushaho kumenya igihugu n’ubukerarugendo bwacyo.

Kuri Wisdom School Rwanda, uru ruzinduko rw’abahagarariye amashuri yo muri Nigeria rwatumye imbaraga iri shuri rimaze gushyira mu ireme ry’uburezi, indangagaciro, umuco no gutegura abanyeshuri ku mahirwe mpuzamahanga zishyirwa mu biganiro n’abafatanyabikorwa baturutse hanze y’u Rwanda.

Ni na bwo buryo iri shuri rishaka gukomeza kwagura umuryango w’amahirwe ku banyeshuri baryo, kugira ngo ubumenyi bahabwa mu Rwanda bubashe kubafungurira amarembo yo kwiga, gukora no guhangana ku rwego rwa Afurika no ku Isi.