Rutsiro:Abashoramari n’akarere batunganije umuhanda ugana ahazabera Expo & Festival
Mu rwego rwo kwitegura Rutsiro Beach Festival, izabera mu Karere ka Rutsiro kuva ku wa 9 kugeza ku wa 15 Ukuboza 2025, ubuyobozi bw’akarere n’abaturage barishimira ibikorwa bitandukanye birimo gukorwa n’abafatanyabikorwa hagamijwe kunoza imyiteguro y’iri serukiramuco rizitabirwa n’abaturutse mu gihugu hose.
Kimwe mu bikorwa byishimiwe cyane ni gutunganya umuhanda uva Gahabwa werekeza ku kiyaga cya Kivu, ugaca kuri Palega Beach Inn ahazabera Expo, ugakomereza kuri nyubako ya Hon. Chrisologue i Kinunu, ndetse no kuri Hon. Nyiramirimo ahateganyirijwe ibikorwa bya Expo & Festival.
Abaturage bo muri aka gace bavuga ko gutunganywa kw’uyu muhanda ari intambwe ikomeye mu kubakura mu bwigunge no guteza imbere ibikorwa byabo bya buri munsi.
Nyirabagenzi Vestine, utuye hafi ya Palega Beach Inn, yagize ati:“Uyu muhanda wari warangiritse cyane ku buryo imodoka zatinyaga kuhaca. Kuba bawutunganyije bitumye dutekereza ko ibikorwa nk’ibi bituzanira iterambere mu gihugu, tukerekana ko natwe dushoboye kwakira ba mukerarugendo n’abashyitsi.”
Imashini zikora imihanda zitanzwe na ba rwiyemezamirimo bo mu karere ka Rutsiro
Nshimiyimana Thomas, umucuruzi i Kinunu, we yagize ati“Iri serukiramuco rizatuzanira abakiriya cyane . Uwatekerezaga ko kuza hano yabangamirwaga n’umuhanda. Ubu imodoka ziragenda neza, natwe tuzabona isoko n’amahirwe yo kwiteza imbere.
Umuyobozi wa Yirunga Ltd, Bwana Yves Iyaremye, akaba n’umwe mu bakuriye umushinga Kivu Beach & Festival Expo , Rutsiro Edition, avuga ko iki gikorwa gifite inyungu ku karere no ku baturage.
Yagize ati:“Perezida wa Repubulika yaduhaye imihanda myinshi ya kaburimbo, ariko hari aho abaturage bataragerwaho n’imihanda myiza. Ni yo mpamvu abanyarutsiro n’abandi bafatanyabikorwa biyemeje gushyira hamwe kugira ngo bakemure ikibazo cy’uyu muhanda wari urimo ibinogo. Ibi bizatuma iserukiramuco rigenda neza, kuko iyo umuhanda ari mubi n’abitabira ibikorwa nk’ibi baba bake.”
Iyaremye Yves ukuriye umushinga Kivu Beach, nawe yasuye aho ibi bikorwa birimo kubera muri Rutsiro.
Yakomeje avuga ko iki gikorwa kimaze kubona abaterankunga barimo BRALIRWA, kandi ko hazitabira abahanzi bakunzwe mu Rwanda barimo Yangresi, Impara, Igisupusupu, Platini na Theo Bosebabireba, bose bemeye kuza gushimisha abazitabira iki gikorwa.
Uwizeyimana Emmanuel, Umuyobozi w’Akarere ka Rutsiro ushinzwe Iterambere ry’Ubukungu, yavuze ko uyu muhanda wari mu bibazo byabangamiraga imyiteguro y’iserukiramuco kuko wari wuzuyemo amabuye n’ibinogo, nyamara aka kakaba ari agace gafite amahoteli menshi.
Yagize ati:“Kubera ubufatanye bw’akarere, abashoramari ndetse n’abaturage twabashije gutunganya uyu muhanda. Hari na kompanyi zitangiye imashini zunganira mu bikorwa byakozwe.”
Umuyobozi w’Akarere ka Rutsiro ushinzwe iterambere ry’ubukungu Uwizeyimana Emmanuel
Yakomeje avuga ko uyu muhanda uzafasha mu kugeza umusaruro ku isoko, guteza imbere ubukerarugendo, kumenyekanisha akarere ka Rutsiro, no mu gukurura abashoramari bashya.
Agasaba abaturage kubungabunga ibikorwaremezo no kuzitabira iserukiramuco ari benshi, kandi abasaba ko amahoteli n’abashoramari bitegura neza kwakira abashyitsi.
