Musanze: MIPC ikomeje gusakaza iterambere mu baturage bo muri Musanze
Kuva Ishuri rya MIPC ryo mu Murenge wa Cyuve, Akarere ka Musanze, rihageze, abaturage bavuga ko ryagize uruhare rukomeye mu guhindura imibereho yabo, binyuze mu guha abana amahirwe yo kwiga imyuga n’andi masomo, guhanga imirimo no guteza imbere ubucuruzi bw’abaturiye aho riherereye.
Bamwe mu baturage bavuga ko iri shuri ryabafashije kubona amahirwe batari bafite mbere, kuko abana babo babonye aho bigira ubumenyi buzabafasha kwihangira imirimo no kubona akazi, mu gihe abandi baturage bungukiye mu mirimo itandukanye irikorerwamo no mu bucuruzi bwiyongereye muri ako gace.
Ibi babigarutseho ku wa 6 Ugushyingo 2026, ubwo MIPC yateguraga umunsi w’imurikabikorwa uzwi nka Career Day, hagamijwe kugaragaza ubumenyi abanyeshuri bafite, imishinga bahanga ndetse n’uruhare ishuri rifite mu iterambere ry’abaturage.
Muri iri murikabikorwa hagaragajwe imishinga itandukanye irimo iy’ikoranabuhanga, gukora amakaro arengera ibidukikije hifashishijwe ibimene by’amacupa, gukora amatafari, amategura n’ibindi bikoresho byifashishwa mu bwubatsi.
Hanamuritswe inzu MIPC yubatse igenewe umuturage utishoboye wo muri ako gace, igikorwa cyagaragaje ko uruhare rw’iri shuri rutagarukira mu gutanga uburezi gusa, ahubwo rugera no ku mibereho y’abaturage.
Umwe mu babyeyi bafite umwana wiga muri MIPC avuga ko iri shuri ryagize akamaro kanini mu muryango we, kuko umwana we yabonye amahirwe yo kwiga ibijyanye n’amashanyarazi, ubumenyi abona ko buzamufasha mu buzima bw’ejo hazaza.
Yagize ati: “Kuba iri shuri ryarageze hano byaradufashije cyane. Umwana wanjye yabonye aho yigira ibijyanye n’amashanyarazi, kandi ni umwuga ashobora kuzakoresha yishakira imibereho aho gutegereza akazi k’undi muntu. Ni amahirwe atari yoroshye ko abana bacu babona hafi y’aho batuye.”
Akomeza avuga ko uretse amahirwe y’uburezi, iri shuri ryagize uruhare mu kuzamura ubukungu bw’abaturage, kuko abacuruzi batandukanye babonye abakiriya bashya, abafite amazu yo gukodesha bakabona abayakodesha, bityo hakaboneka amafaranga atari asanzwe muri ako gace.
Yagize ati: “Mbere y’uko ishuri rihagera, ubucuruzi bwari butandukanye n’uko bumeze ubu. Ubu hari abantu baza kuhiga, abakozi n’abandi bakenera serivisi zitandukanye. Abacuruzi barunguka, abafite amazu bakabona abayakodesha. Ibi bituma n’imiryango myinshi ibona uko yiteza imbere.”
Inzu yubakiwe umuturage igiye kumufasha kuva mu bukode
Mu bikorwa byamuritswe kandi harimo inzu MIPC yubatse igenewe umuturage utishoboye wo mu Murenge wa Cyuve, wavuze ko yari amaze igihe abayeho mu buzima bugoye kubera kutagira aho aba heza kandi hahoraho.
Uyu muturage avuga ko mbere yabaga mu nzu z’ubukode, bigatuma amafaranga yabonaga ayagabanya hagati yo kwishyura aho kuba n’ibindi byo mu buzima bwa buri munsi.
Yagize ati: “Nari maze igihe mbayeho nabi kuko ntagiraga inzu yanjye. Nahoraga nshakisha aho kuba, rimwe na rimwe nkajya mu bukode, kandi amafaranga nabonaga akenshi agashirira mu kwishyura inzu. Kuba mbonye iyi nzu ni ibintu binteye ibyishimo, kuko ngiye kujya nzigama amafaranga najyaga ntanga mu bukode nkayakoresha mu bindi bikorwa by’umuryango wanjye.”

Uwakodeshaga yashyikirijwe inzu na MIPC
Yashimiye ubuyobozi bwa MIPC n’Itorero ry’Abangilikani mu Rwanda ku gikorwa cy’ubufasha bamugiriye, avuga ko cyamuhaye icyizere cyo kubaho neza no gutekereza ku iterambere ry’umuryango we.
Abanyeshuri bashaka ibisubizo birengera ibidukikije
Mu mishinga yagaragajwe muri iri murikabikorwa harimo n’uw’umunyeshuri wiga ibijyanye n’ubwubatsi muri MIPC, witwa Janvier Niyogisubizo kimwe n’abagenzi be watekereje uburyo ibimene by’amacupa abantu benshi bafata nk’imyanda byakoreshwa mu gukora amakaro.
Uyu munyeshuri avuga ko igitekerezo cy’uyu mushinga cyaturutse ku gushaka guhindura imyanda ikintu gifite akamaro, ariko kinagira uruhare mu kurengera ibidukikije.
Yagize ati: “Hari ibimene by’amacupa byinshi abantu bata, ariko njye natekereje ko bishobora kongera gukoreshwa. Nifashishije ibyo bimene, umucanga, sima y’umweru na garaviye nkora amakaro ashobora gukoreshwa mu bwubatsi. Intego ni ukwerekana ko imyanda ishobora guhinduka umutungo igihe umuntu ayitekerejeho mu buryo bushya.”
Avuga ko uyu mushinga ari intangiriro y’igitekerezo ashaka kurushaho kunoza, ku buryo wazavamo igikorwa cy’ubucuruzi kimwinjiriza amafaranga, ariko kikanafasha kugabanya imyanda yangiza ibidukikije.
Uyu mushinga ugaragaza uruhare rw’uburezi bw’imyuga mu gufasha abanyeshuri kudahera ku bumenyi biga mu ishuri gusa, ahubwo bakabukoresha mu gushaka ibisubizo by’ibibazo biri mu miryango yabo no mu gihugu muri rusange.
Ubuyobozi bwa MIPC busaba abaturage gukomeza kugana ishuri
Umuyobozi wa MIPC, Manzi Innocent, avuga ko intego y’umunsi wa Career Day ari uguha abanyeshuri umwanya wo kugaragaza ibyo bize n’ubushobozi bafite, ariko kandi ukaba n’umwanya wo kwegera abaturage no kubereka umusaruro w’ubumenyi butangirwa muri iri shuri.
Avuga ko bashaka ko abaturage basobanukirwa ko ishuri ritagomba kuba ahantu abana bajya kwiga gusa, ahubwo ko rikwiye no kugira uruhare mu gukemura ibibazo by’abaturage no kubafasha kwiteza imbere.
Yagize ati: “Twateguye uyu munsi kugira ngo abanyeshuri bagaragaze ibyo bashoboye gukora, imishinga bafite n’uburyo ubumenyi bahabwa bushobora kubafasha kwihangira imirimo no guteza imbere igihugu. Turashaka ko ibyo biga bitagarukira mu mashuri gusa, ahubwo bigera no mu buzima busanzwe.”
Yasabye abifuza kwiga imyuga n’andi masomo kugana MIPC kugira ngo bamenye amahirwe ahari, ndetse n’abaturage baturiye iri shuri bakajya barisura kenshi, bakareba ibikorwa birikorerwamo n’ubumenyi butangirwamo.
Yagize ati:“Turifuza ko abaturage bakomeza kuza kudusura, bakamenya ibyo dukora n’ubumenyi dutanga. Ishuri riri mu gace runaka rikwiye kugira icyo rihindura mu iterambere ryaho, kandi natwe ni byo twiyemeje gukomeza gukora.”

Umuyobozi wa MIPC, Manzi Innocent, avuga ko umunyeshuri akwiye kwiga agamije ubumenyi
Uruhare rwa MIPC mu Murenge wa Cyuve, Akarere ka Musanze; rugaragaza ko uburezi bufite ireme budakwiye gupimirwa gusa ku masomo abanyeshuri bize, ahubwo ko bunapimirwa ku bushobozi bubaha bwo guhanga ibisubizo, kwihangira imirimo no kuzamura imibereho y’abaturage.

MIPC yatanze ubwisungane mu kwivuza ku miryango itishoboye yo muri Cyuve
Iri shuri kugeza ubu rifite programe 5 z’igisha ikoranabuhanga, ku rwego rwa A1, bikaba biteganijwe ko umwaka utaha hazatangira gutangwa amasomo ku rwego rwa A0 rikaba rifite kugeza ubu abanyeshuri basaga ibihumbi 2.
Iyo ishuri rihuje ubumenyi, udushya n’imikoranire n’abaturage, rishobora kuba imwe mu nkingi z’iterambere rirambye ry’aho rikorera.
Umwanditsi : Ikirezi Marie Pacific

