Kwita Izina 2026: SACOLA yifashishije imikino mu kwegera abaturage no gutegura umunsi mukuru

Mu gihe Akarere ka Musanze kihiza iminsi ibarirwa muri mike kugira ngo kakire umuhango wa Kwita Izina abana b’ingagi, SACOLA yatangiye ibikorwa bibanziriza uyu munsi mukuru mpuzamahanga, ikoresha imikino nk’umuyoboro wo kwegera abaturage, kubakangurira kubungabunga ibidukikije no gukomeza guteza imbere imibanire myiza n’abaturage baturiye Pariki y’Igihugu y’Ibirunga.

Umukino wa gicuti wahuje Inyangakugoma z’Akarere ka Musanze n’abakozi b’Urwego rw’Igihugu rw’Iterambere (RDB), wabereye ku Kibuga cya Kampanga mu Murenge wa Kinigi ku wa Gatanu tariki ya 14 Kanama 2026, wabaye kimwe mu bikorwa byatangije iyi gahunda.

Inyangakugoma z’Akarere ka Musanze ni zo zacyuye intsinzi, zitsinda RDB igitego kimwe ku busa, mu mukino wakurikiwe n’abaturage benshi bo muri Kinigi n’abo mu bice biyikikije.

Ariko kuri SACOLA, igisobanuro cy’uyu mukino nticyari ugushaka ikipe yatsinze gusa, ahubwo wari uburyo bwo kwegera abaturage no kubagezaho ubutumwa bujyanye no kubungabunga urusobe rw’ibinyabuzima, mu gihe hategurwa Kwita Izina 2026.

SACOLA, umuryango ukorera mu gace ka Kinigi mu Karere ka Musanze, ushyira hamwe ibikorwa byo kubungabunga ibidukikije no guteza imbere imibereho y’abaturage baturiye Pariki y’Igihugu y’Ibirunga. Intego zawo zirimo gufasha abaturage kugira imibereho myiza, kubungabunga ibidukikije no guteza imbere ibikorwa by’iterambere bibafasha kubaho neza. Ni muri uyu murongo SACOLA yateye inkunga ibikorwa by’imikino bibanziriza Kwita Izina 2026, aho irushanwa rizahuza amakipe ahagarariye uturere tune twegereye Pariki y’Igihugu y’Ibirunga, ari two Musanze, Burera, Nyabihu na Rubavu.

Umuyobozi wungirije wa SACOLA, Habarurema Fidele, yavuze ko igikorwa cyatangiriye i Musanze kizakomereza no muri utu turere, ashimira ubuyobozi bw’Akarere ka Musanze ku bufatanye bwabwo.

Yagize ati: “Turashimira ubuyobozi bw’Akarere bwemeye ko dutera inkunga iyi mikino. Ni igikorwa twatangiye kizabera mu turere tune ari two Burera, Musanze, Nyabihu na Rubavu.”

Yakomeje ati:“Iyi ni intangiriro. Gahunda irakomeje, iyi mikino irakomeza muri twa turere twavuze.”

Ibi bituma imikino iba umuyoboro wo guhuza abaturage bo mu turere duturiye Pariki y’Ibirunga, abayobozi n’abafatanyabikorwa mu bikorwa byo kubungabunga ibidukikije no guteza imbere abaturage.

Umuyobozi w’Umurenge wa Kinigi, Gahonzire Landuard, yavuze ko ibikorwa nk’ibi bifite uruhare mu gukangurira abaturage gusobanukirwa akamaro ko kubungabunga urusobe rw’ibinyabuzima.

Yagize ati: “Umuhango wo Kwita Izina abana b’ingagi uri hafi. Musanzwe muwumenyereye kandi abenshi mwagiye muwitabira. Iyi mikino twatangiye ni ubukangurambaga kugira ngo abaturage murusheho kumenya ibijyanye no kubungabunga urusobe rw’ibinyabuzima.”

Uyu murongo ujyanye n’inshingano SACOLA yiyemeje kuva yatangira, kuko ibikorwa byayo bigamije guhuza kubungabunga Pariki y’Ibirunga n’iterambere ry’abaturage bayikikije. SACOLA ivuga ko ibikorwa byayo n’ubufatanye n’abandi bafatanyabikorwa byafashije mu guteza imbere imibereho y’abaturage baturiye Pariki, binyuze mu bikorwa bitandukanye by’iterambere.

Mu bikorwa SACOLA yakoze mu Karere ka Musanze harimo n’ibirebana n’ibikorwa remezo n’imibereho myiza.

Mu 2026, urugero, ku bufatanye n’abafatanyabikorwa, SACOLA yakomeje gushyigikira imiryango itishoboye ndetse n’ibikorwa by’amazi n’amacumbi mu baturage baturiye Pariki. (SACOLA)

Ibi bigaragaza ko ibikorwa byo gutegura Kwita Izina, birimo n’imikino, bishobora kuba umwanya wo gukomeza ubufatanye hagati y’abaturage, inzego z’ubuyobozi n’abafatanyabikorwa mu iterambere ry’Akarere ka Musanze.

Abayobozi banyuranye bakurikiye uyu mukino

Madamu Louise Mbabazi, Umuyobozi muri RDB ushinzwe guhuza Pariki z’igihugu n’abaturage, yashimiye SACOLA ku nkunga yatanze mu bikorwa bibanziriza Kwita Izina.

Yavuze ko kuba abaturage baterana mu bikorwa nk’ibi bakabigiramo ibyishimo ari ikimenyetso cy’amahoro n’umutekano, asaba ko ibirori bya Kwita Izina byategurwa neza kandi bikajyana n’isuku.

Yagize ati: “Ndashimira SACOLA yateye inkunga ibi birori mwabonye. Iyo abantu bafite ibirori bishimye, biba bigaragaza ko bafite amahoro n’umutekano.”

Mbabazi yavuze kandi ko uburyo bwo gutegura Kwita Izina bukomeje guhinduka, hagashyirwa imbere imicungire myiza y’ibirori.

Yibukije abaturage ko Kwita Izina ari umuhango ufite umwihariko mpuzamahanga, kuko ukurura abantu baturutse hirya no hino ku Isi kubera umutungo kamere w’u Rwanda, by’umwihariko Pariki y’Ibirunga n’ingagi zo mu misozi.

Yagize ati: “Muzi ko Isi yose iba yaje iwacu i Musanze, kubera ibyiza dufite ari byo Ibirunga n’ingagi, murasabwa gukomeza kugira isuku ndetse no gukomeza kugira umuco mwiza wo kwakirana urugwiro abatugana .”

Uruhare rwa SACOLA ntirugarukira ku bikorwa byo gutegura Kwita Izina gusa. Umuryango uvuga ko kuva washingwa, washyize imbere guhuza kubungabunga ibidukikije no kuzamura imibereho y’abaturage baturiye Pariki y’Ibirunga.

Mu bikorwa byayo harimo gufasha abaturage kubona ibikorwa remezo n’ubufasha bugamije kuzamura imibereho yabo. SACOLA kandi ikorana n’abafatanyabikorwa mu mishinga ijyanye n’imibereho myiza, iterambere rirambye, urubyiruko no kubungabunga ibidukikije.

Ku ruhande rw’Akarere ka Musanze, ibikorwa nk’ibi bifite umwihariko kuko Kinigi ari ahantu h’ingenzi mu bukerarugendo bushingiye kuri Pariki y’Ibirunga n’ingagi.

Ni yo mpamvu kwegera abaturage no kubashishikariza kugira uruhare mu kubungabunga umutungo kamere ari ingenzi mu gukomeza guteza imbere ubukerarugendo, ari na bwo bukomeza gutanga amahirwe y’iterambere ku baturage.

Irushanwa ry’imikino riterwa inkunga na SACOLA rizakomereza mu turere twa Musanze, Burera, Nyabihu na Rubavu, aho rizakomeza guhuza abaturage no gutanga ubutumwa bujyanye no kubungabunga ibidukikije.

Mu gihe imikino ikomeje, abaturage bo muri utu turere banasabwa gukomeza kugira uruhare mu bikorwa bibungabunga ibidukikije, kugira isuku no kwakira neza abashyitsi bazitabira ibikorwa bya Kwita Izina.

Umuhango wo Kwita Izina abana b’ingagi 21 uteganyijwe mu Murenge wa Kinigi, Akarere ka Musanze, ku itariki ya 4 Nzeri 2026. Ibi bikorwa bibanziriza uyu muhango bikomeje gutanga umwanya wo guhuza imikino, ubukangurambaga bwo kubungabunga ibidukikije n’iterambere ry’abaturage baturiye Pariki y’Igihugu y’Ibirunga.