Amerika yavumbuye umuti uvura Covid-19 igakira mu minsi 5 gusa
Yanditswe na Rwandayacu.com
Kuwa Kane tariki 22 Ukwakira, Ikigo cya Leta Zunze Ubumwe za Amerika gishinzwe Imiti n’Ibiribwa, (FDA), cyemeje ko uyu muti ushobora kuvura COVID-19 igakira mu minsi itanu gusa nk’uko byagaragaye mu igeragezwa ryawo.
Uyu umuti witwa Remdesivir uvura Coronavirus igakira burundu, Leta zunze Ubumwe z’Amerika ,ishimangira ko wemerewe gukoreshwa mu buvuzi.
Remdesivir ni umwe mu miti yakoreshejwe bwa mbere mu kuvura Covid-19, ndetse ni nawo wahawe Perezida Trump ubwo aheruka mu bitaro yanduye iki cyorezo. Muri Amerika ni umuti wemewe uhabwa n’abarwayi b’iyi ndwara. Wari usanzwe wifashishwa mu kuvura n’izindi ndwara zirimo na Ebola.
Uyu muti wakozwe n’Ikigo cyo mu Mujyi wa California cyitwa Gilead Sciences Inc, kiwuha izina rya Veklury.
FDA iti “Veklury ni wo muti wa mbere uvura COVID-19 wemewe na FDA”.
Iki kigo cyakomeje kuvuga ko uyu muti wemerewe kuvura abantu bakuze n’abana bato bafite kuva ku myaka 12.
Amerika yemeje uyu muti nyuma y’iminsi mike OMS nayo isohoye ubushakashatsi bugaragaza ko kugeza ubu nta muti n’umwe ushobora kwizerwa mu kuvura COVID-19.
Remdesivir ni muti Amerika yemeza ko uvura Covid mu gihe cy’iminsi itanu umurwayi agakira
OMS yari yakoze igenzura ku miti ine harebwa niba ishobora kwifashishwa mu kuvura Covid-19, irimo Remdesivir na Hydroxychloroquine.
Ubwo bushakashatsi bwakorewe kuri Remdesivir cyo kimwe na Hydroxychloroquine ivura malariya, Interferon yongera ubudahangarwa bw’umubiri hamwe n’imiti ya Lopinavir/Ritonavir ihabwa abafite agakoko gatera Sida.
Igenzura ry’uburyo iyi miti ikora ryakorewe ku barwayi bakuze 11266 bo mu bitaro 500 mu bihugu bigera kuri 30.
Ryagaragaje ko Remdesivir idashobora gufasha umurwayi wa Covid-19 ku buryo yoroherwa vuba cyangwa ku buryo atahitanwa n’iyi ndwara.
OMS yatangaje ko ubushakashatsi kuri Hydroxychloroquine na Lopinavir/Ritonavir bwahagaritswe muri Kamena nyuma y’aho bigaragariye ko iyi miti yombi idafite ubushobozi bwo kuvura Covid-19.
N’ubwo ariko Leta zunze Ubumwe za Amerika zishimangira ko uyu muti uvura Covid-19, ariko OMS yo ntirawemeza nk’uko ubushakashatsi bwamaganiwe kure na Gilead yakoze Remdesivir, aho iki kigo cyatangaje ko ibyo OMS yagaragaje atari byo. Cyo cyari giherutse kwerekana ko uyu muti ufasha uwuhawe ku buryo mu minsi itanu aba yorohewe Covid-19.
Kuba ariko Amerika ivuga ko yavumbuye umuti ntibivuze ko abantu batakomeza kwirinda bambara udupfukamunwa no gukurikiza andi mabwiriza.Inkuru dukesha Igihe.com
