Rulindo:Abaturage barasabwa kubyaza umusaruro imurikabikorwa  ry’akarere

Yanditswe na Ngendahimana Jean Pierre.

Ubwo hatangizwaga kumugaragaro imurikabikorwa mu Karere ka Rulindo, ku wa 24 Kanama 2022 ryari ryitabiriwe n’abasaga 56 basanzwe bakora ibikorwa bitandukanye yaba ibikomoka ku buhinzi,ubworozi ndetse n’ibindi.

Ni igikorwa cyishimiwe n’abatari bake ngo kuko batari bagiheruka kubera icyorezo cya covid 19 cyakomye mu nkokora ibikorwa bitandukanye birimo n’ibihuza abantu.

Ku ruhande rw’abatuye aka karere  bavugako bizabafasha kubona aho bagurira ibicuruzwa ndetse bakunguka n’ubwenge mu biri kuhakorerwa

Uwitwa Niyonzima Patrick wo mu Murenge wa Base  avuga kuba imurikabikorwa ryagarutse ari ikintu bagiye gukuramo inyungu nyishi

Yagize ati «  Ibikorwa nk’ibi sinarimbiheruka ariko ubu ndashimira ubuyobozi bw’akarere ndetse n’abafatanyabikorwa bateguye iki gikorwa aha hantu hari ibintu bitandukanye kandi binashimishije rwose ibi bigiye kumfasha kuko nzahakura isomo rizamfasha mu kwiteza imbere,hari imbuto y’ibirayi,ibishimbo n’ibindi kandi ku giciro kiri hasi ».

Ku ruhande ry’abaje kumurika ibikorwa bavuga ko uyu ari umwanya wiza babonye wo guhura n’abatuye aka karere ndetse nabo mu gihugu cyose banamenyekanishe ibyo bakora.

Sina Gerard uzwi ku izina rya Nyirangarama ni umwe mu bashoramari, avuga ko imurikagurisha ari umwanya wo guhura na bagenzi be  akabigiraho

Yagize ati  «  Mu by’ukuri mbonye umwanya wo guhura n’abatari bazi ibikorwa nkora,ababizi ndetse nabakora ibindi bikorwa bitandukanye ibi biramfasha kumenya icyo abakiriye banjye bashaka binamfashe kuganira n’abandi bakora ibikorwa bitandukanye muri aka karere ku buryo twaganira tugateza imbere aka karere kacu natwe tutisize ».

Sina Gerard akomeza avuga ko uretse guhura n’abaguzi baganira n’akarere barebe ku mbogamizi zikigaragaramo bityo bazishakire ibisubizo kandi uretse n’ibyo baranacuruza kuko hari abashaka ibyo bakora ntibabibone bivuze ko bazabisanga muri ririya murikabikorwa.

Rulindo mu imurikabikorwa hamuritswe n’umusaruro ukomoka ku buhinzi (foto Rwandayacu.com).

Umuyobozi w’akarere ka Rulindo Mukanyirigira Judith,avugako harimo service zitandukanye yaba mu buhinzi n’ubworozi, ubukorikori, ubucuruzi, ubucukuzi bw’amabuye y’agaciro n’ibindi kandi hari n’abatuye muri aka karere bagakwiye kuza kuhigira ubumenyi kuko ari ahateraniye abantu benshi.

Meya  Mukanyirigira aragira ati : «  Hari abantu benshi cyane b’abashoramari, abanyabukorikori n’ubugeni ndetse n’abandi uyu  ni umwanya mwiza tubonye wo gusura ibiri kuhakorerwa na njye nzafata umwanya nzekubisura ; by’ukuri ni Imurikabikorwa ririkubera ku muhanda unyurwamo n’abatari bake rero yaba abatuye muri aka karere ka Rulindo ndetse n’abandi bagakwiye kuza bakigira hano ndetse n’abafite ibikorwa byabo bahawe ikaze nibaze baganire na bagenzi babo ».

Umuyobozi w’akarere ka Rulindo  Mukanyirigira Judith (foto Rwandayacu.com)

Iri murikabikorwa rizasozwa ku wa   wa 26 Kanama 2022,ni ukuvugako rizamara iminsi 3,umwihariko  waryo ni uko ryitabiriwe n’abasaga 56 ndetse hakaba hari hashije imyaka  3 ritaba kubera icyorezo cya Covid 19.

Ubuyobozi bw’akarere ka Rulindo bukavugako buzafata umwanya wo kuganira n’abafatanyabikorwa bakareba inzitizi bahura na zobityo zigashakirwa umuti.

 34,666 total views,  8 views today