Musanze: “Twiyemeje kurera abana bacu gikirisito tubarinda amacakubiri.Reverand Pastor Bizimana”

Yanditswe na Ngaboyabahizi Protais

Ubwo abakirisito bo mu Itorero ry’Ivugabutumwa ry’inshuti mu Rwanda EEAR (Eglise Evangelique des Amis au Rwanda) basuraga urwibutso rw’abazize jenoside yakorewe abatutsi mu 1994;Reverand  Pastor Bizimana Thomas Umuyobozi wa Region y’Amajyaruguru muri itorero,yavuze ko buri mukirisito akwiye kurera umwana we mu nzira nziza , akunda Imana ndetse n’igihugu cye muri rusange kugira ngo akirinde ibibi byose byakigwirira.

Reverand Pastor Bizimana Thomas yagize ati: “ Jenoside yakorewe abatutsi mu 1994, yakozwe muri kino gihugu 90% bari abakirisitu , abo bose kandi bamwe mu bana babo ndavuga urubyiruko urubyiruko nabo bari barabatijwe, ariko ntibyabujije ko bitabirira ibikorwa bibi bigabisha kuri Jenoside, twebwe rero nyuma yo gusura urwibutso rwa Musanze, no kumva amateka y’igihugu cyacu, twahisemo kwigisha abana bacu kugendera kure amacakubiri, twifuza ko ibyabaye mu gihugu cyacu bitazongera”.

EEAR yatanze amafaranga yo gufasha uwarokotse Jenoside utishoboye (foto Rwandayacu.com)

Pastor Bizimana yongera ko  umukiririsitu akwiye kurangwa n’urukundo akamaganira kure ikintu cyose cyatuma agwa mu cyaha, akomeza avuga ko mu gihe cyo kwibuka bakomeza gushishikariza abakirisito babo ko Jenoside ari ikintu kidakwiye kongera kuba mu Rwanda no ku isi yose.

Akomeza ashishikariza abakirisitu bose gukomeza kwisunga Bibiriya n’isengesho kugira ngo bakomeze  kuyoborwa n’Ijambo ry’Imana , kuko ni byo bizatuma bakomeza kwirinda ikibi cyose.

Nyiramahirwe Alphonsine akuriye abagore bo muri EEAR Region y’Amajyaruguru na we ashimangira ko gusura Urwibutso bituma bafata ingamba zo kurwanya Jenoside.

Yagize ati: ‘Ubu ibyo mbonye hano ngiye kwibiganiza abagore bo muri Region yacu, nk’ababyeyi dukomeze kwigisha abana bacu urukundo, bumva ko igihugu ari icy’abanyarwanda , ndetse bibaye ngombwa twazajya no gusura izindi nzibutso nk’abagore bitorero , kugira ngo dukomeze twigireho, tuzakomeze no gutoza abana bacu urukundo, ndasaba buri mukirisitu wese guha agaciro no kwibuka abazize Jenoside , ariko aharanira ko itazongera kuba iwacu mu Rwanda no ku isi yose”.

Mu muhango wo kunamira inzirakangane  zazize Jenoside wakozwe na EEAR, Umukozi w’akarere ka Musanze Butunge Pascal, yavuze ko yishimira iki gikorwa bakoze maze abasaba gukomeza kwegera abo bakorana na  bo bose ndetse n’abo basengana, gukomeza kubaka amahoro.

Yagize ati: “ Mu gihe Jenoside yakorwaga hari abanyamadini n’amatorero bishoyemo, bari barabatijwe, aha rero nshimira ko kuri ubu abanyamadini na  bo bibuka, nkaba rero mbasaba ko bakomeza kujya bigisha abo bayobora, ariko cyane cyane abana babo bagakura bafite imyumvire irwanya ivangura iryo ari ryo ryose”

Itorero EEAR mu ntara y’Amajyaruguru , uretse kuba rivuga ubutumwa bwiza bw’Imana, rifite n’ibindi bikorwa biganisha ku iterambere, harimo, ibigo by’amashuri abanza n’ayisumbuye, kwita ku batishoboye n’imishinga mito mito rigenda ritoza abaturage nkubuhinzi n’ubworozi kimwe n’ubundi bushabitsi buzamura umukirisito mu mwuka no mu mubiri.

Umunsi EEAR yasuraga urwibutso rw’abazize Jenoside yakorewe abatutsi  mu 1994, hatanzwe n’amafaranga yo kuremera umwe mu batishoboye wazize Jenoside.

Abakiristo n’Abayoboziba EEAR basuye urwibutso rwa Musanze (Rwandayacu.com)

Ubwo EEAR yasuraga urwibutso rwa Musanze hari n’abakozi b’akarere ka Musanze (foto Rwandayacu.com).

 2,139 total views,  2 views today